بقلم م امجد أبو ريا #اسمع ياقتيبه
قبل ما تسافر …انزل على وسط البلد وصور حاويات الزباله اللي على مدخل مطعم هاشم …ولا تنسى تصور الناس واقفه بالدور على كنافه حبيبه …وهيك خذ كم صوره عفويه لبياعين المحارم الورقيه …والاطفال البائسين بياعين العلكه ….وصور الماره من امام المسجد الحسيني ….كثير منهم بحكي مع حاله …وانت بالغربه دقق بالصور رح تشوف هم الديون والهم والغم وقهر الرجال …
واهلك طالعين يوصلوك على المطار …صور مزارع الزيتون ..مشان كل ما تحن لصحن الزيت والزعتر …تتذكر احنا البلد اللي طلعت من زيت الزيتون مصانع سجاير ومعسل …..
مش كل ما دق الكوز بالجره تصير تكتب على الفيسبوك وتتبكبك على الوطن الجميل وانت قاعد على الساحل الامريكي وتحكي آخ على صحن فول من مطعم هاشم …ولا صحن كلاج عمر …..انت واحد كذاب ..الهمبرغر ازكى الف مره من قرص الفلافل المعمول من حمص مسوس ..
وقتيبه يا حبيبي تذكر اننا كل الاردنيين من كافة الاصول والمنابت الفقر والجوع هاري وبرنا ….والفساد مش مفرق بين شركسي ودرزي وشامي وشرق النهر وغرب النهر …..مش اول ما تصل تتذكر عنصريتك وتتجلى اقليميتك …وما يصير وراك غير الفيسبوك تردح فيه وخوفك ع البلد وتنسى انك قاعد في بلاد سبب هجرتك اليها التنوع العرقي والاصول والمنابت وحتى اختلاف المعتقدات والعقائد ….
يا قتيبه تذكر كيف بشلوا امل الفاسد المسكين واللي ظهره مسنود بطبعوا الو الوثائق اللازمه بنفس اليوم ….تذكر المسؤول اللي تلثم من اجل الايقاع ببائع بطاريات سيارات تهرب من ضريبة مبيعات جائره ….وما فكر يدخل مزرعه فيها خطوط انتاج تنتج سجاير بملايين الدنانير تغرق السوق بدون ان تدفع مليم لخزينة الدوله …وكل قصص المطاردات لمهربي الدخان على الحدود ..هيك بس اكشن مشان نصدق في مكافحة تهريب ..
يوم الجمعه رح ابصق عليك اذا اتصلت على التلفزيون الاردني وتحكي مشتاق لارض الوطن …يا كذاب …..هاي البرامج خاصه فينا احنا الرذاذ ودود الارض مشان نصدق ان كل شي بخير والبلد بخير والحكومه امنه ومؤمنه ضد الغير …
لا تحكي عن ديمقراطية الغرب الزائفه …شو ما كانت بضل افضل من ديمقراطيتنا الخليطه …بين دوله قهريه على الفقير والانسان العادي ودوله القانون لاصحاب العطوفه والسعاده والمعالي ……
وتذكر مستحيل تلاقي عضو كونجرس او عضو مجلس نواب في اي برلمان اوروبي يمثل سارق الكهرباء في التسويه بين لص الكهرباء وشركة الكهرباء …لان مافي مشرع شريف برضى يكون محامي من يسرق مقدرات البلد ….وما رح تلاقي واحد صايع كاسر عين اصحاب السعاده والمعالي ..ولا شيوخ عشاير عاملين افلام “بورنو” ….
اهتم بمستقبلك واعمل دولارات بالحلال وعيش حياتك …واحكي الوطن مش ارض ولا وديان وسهول ….الوطن كرامه ….لو اعتدي عليها من الخارج الروح بترخص لاجلها ….لكن اذا كان حاميها حارميها اتركها …والعن روح احمد شوقي لانه قال …هب جنة الخلد اليمن لا شيء يعدل الوطن …لانه كان لازم يحدد اي نوع من الاوطان ….لان مش كل وطن جنة خلد …..لما الوطن يصير مزارع للحراميه ….والكل خايف من فاسد هارب بصير مزرعه …..
مع السلامه يا قتيبه .