برقيه الى دولة سمير الرفاعي فايز شبيكات الدعجه

معلش أسألك دولة سمير الرفاعي – انت حاكي ان استقالتك بالربيع العربي كانت بدافع احساسك بالواجب؟ انت حكيت هيك؟احساس شو وأي واجب تحكي عنه؟
كمان حاكي انك عملت برنامج حكومي قابل للقياس، ومدونة سلوك إعلامية، ومدونة سلوك خاصة بالوزراء؟ وينهم؟ ليش باقي مخبيهم!؟ . أول مره نسمع عنهم.
اسمع دولتك.. خلينا صحاب الله يخليك. لو سمحت وبلاش نخسر بعض.. خلص .. .. لو سمحت.
ابوك كان لحيه غانمه وانت كمان منيح واسمالله عليك.وابنك الله يخليه رح يصير رئيس ورزا مثلك ومثل جدك وابوك؟
بيكفي عاد شفلك ناس غيرنا. لو سمحت يعنى، ترى الشغله واصله معنا لهون وبلاش تزعلنا منك… وحد الله احسنلك.خليها مستوره وبلاش ننشر غسيل بعض عن إنجازاتك.
اسمعني منيح دولتك- من مجلس الاعيان لبيتكو على طول. بلاش تظل رايح جاي على المحطات الفضائية وتعمل معها مقابلات. ترى هظول بيغرقوا سفن. بعملوا اثاره وتفاعل اجتماعي عنيف زي الي صار معك بعد المقابله. دير بالك على حالك وخليك حِدِق وقدع وقد حالك حتى نتعاون معك بس تصير رئيس وزرا مره ثانية أو ابنك الله يحفظه… بلاش نسقطك مره ثانية مو كويسه بحقك….إتذكر منيح ترى احنا الي اسقطناك مو انت قدمت استقالت.
اقعد اعوج واحكي عدل واحكيلنا شو الي بدك اياه منا بالزبط من ورا هالمقابلات والتصريحات…شو يعني؟شو قاعد تحكي!؟
وكمان بدي ازيدك من الشعر بيت واذكرك بما قاله برنارد شو عن الإنتهازيين الي يحاولوا يتقربوا منك على أمل انك ترجع رئيس وزراء وياخذوا منك حقيبه. قال – (حيث تتغير المواقف عند الإنتهازيين بناءً على من يدفع أكثر، فإذا إنخفض أجرهم إنقلبوا من ضفة إلى أخرى وصاروا يحدثوننا عن الوطنية
وعن مبادىء الشرف وكأنهم حماتها وأهل الذود عنها). والبقيه عندك وانت سيد العارفين.وما عليك زود.