بالفيديو – شيرين تتحدث عن حالة عادل إمام الصحية وتفجّر مفاجأة عن صلاح السعدني

خلال الجزء الثاني من لقائها في برنامج “واحد من الناس” الذي يقدّمه الإعلامي عمرو الليثي عبر قناة “الحياة”، كشفت الفنانة شيرين تطورات الحالة الصحية للفنان عادل إمام، خاصة في ظل ابتعاده عن الساحة الفنية.

وقالت شيرين: “عادل إمام بيتابع الحركة الفنية وكل شيء، وبكلّمه ودايماً بسأل عليه وبتصل فيه وبيرد عليَّ”. وأضافت: “عادل إمام في صحة جيدة، وليس مصاباً بمرض الألزهايمر كما أشيع وتردّد، وأتواصل معه هاتفياً بشكل مستمر وهو حريص على الحديث معي”.

وفجّرت شيرين مفاجأة عن حالة الفنان صلاح السعدني الصحية إذ قالت: “فقط الفنان صلاح السعدني ربّنا يشفيه ويعافيه… هو اللي بيعاني من الألزهايمر”.

وتابعت: “تحية كبيرة من روحي وقلبي وعقلي للأستاذ عادل إمام وأسرته وزوجته اللي وقفت دايماً جنبه ومعاه، وبقول له ربنا يعطيك الصحة ويسعدك بأولادك ويفرّحك بيهم كمان وكمان، و”الزعيم” عادل إمام هرم كبير وعظيم ربنا يخليه لمصر ودايماً فخورين به، ويا ريت الناس تبطل شائعات ويموتونا ولو متضايقين مننا جمّعونا كلنا في ميدان وموّتونا وخلاص لكن حرام عليكم تتعبوا أعصابنا وتفوّلوا علينا”.

وكانت شرين قد كشفت في الجزء الأول من اللقاء نفسه عن اسمها الحقيقي، حيث قالت: “اسمي الحقيقي أشجان، وأنا اللي اخترت اسم شيرين اللي اتشهرت بيه فنياً، علشان أول عمل كامل كنت بعمله كان اسمه “عيون الحب”، مع كمال الشناوي وسناء جميل، وكنت بلعب دور بنتهم، وكان فيه مجموعة كبيرة من الفنانين”.

وأضافت: “ما احتفظتش باسمي أشجان علشان كنت مخضوضة أوي منه، وزعلانة وزعلت من بابا علشان سمّاني أشجان، أستاذ العربي ذنّبني 3 حصص علشان يدّي محاضرة في اسمي، وسألني قد كده بابا زعلان إني جيت في الدنيا، فسمّاني أشجان… وأشجان يعني أحزان، فرُحت لبابا وقلت له غيّر لي اسمي… بابا راح لمدرّس العربي وقال له أنا قعدت ثلاث شهور أسمّيها وكل لما أكتب اسم وأروح أسجّله يلاقي حد طالب شهادة وفاة فيتخض وكان عنده توأم قبلي توفوا فكان يرجع وبعدين عمّي قال له لازم تكتب الاسم فالست أم كلثوم غنت حاجة وأشجاني فعجبه الاسم وسمّاني أشجان”.

واختتمت شيرين حديثها بالقول: “أنا مش بحب حد ينده لي بأشجان، وكانت والدتي الله يرحمها بتقول لي أشجان لغاية لما واحنا بنعمل مسرحية “المتزوجون” وماشية داخلة المسرح وهي معايا فبتقول لي أشجان، قلت لها مش هردّ عليكِ يا ماما معلش، فقالت لي ليه ما ردتيش؟ فقلت لها علشان أنا مش أشجان”.